ಕನ್ನಡ ಸಂಗೀತ ಪ್ರಿಯರಿಗೆ ‘ತಾಜ್ಮಹಲ್’ ಚಿತ್ರದ ‘ಖುಷಿಯಾಗಿದೆ ಏಕೋ ನಿನ್ನಿಂದಲೇ…’ ಹಾಡು ನೆನಪಿದರೆ ಸಾಕು, ರೋಮಾಂಚನ ಉಂಟಾಗುತ್ತದೆ. ಬಾಲಿವುಡ್ನ ಖ್ಯಾತ ಗಾಯಕ ಕುನಾಲ್ ಗಂಜಾವಾಲ ಅವರು ಕಂಠಸಿರಿಯಲ್ಲಿ ಮೂಡಿಬಂದಿದ್ದ ಈ ಮಧುರ ಗೀತೆ, ‘ಕೃಷ್ಣ’ ಅಜಯ್ ರಾವ್ ಅವರ ವೃತ್ತಿಜೀವನದ ಸೂಪರ್ ಹಿಟ್ ಹಾಡುಗಳಲ್ಲಿ ಒಂದಾಗಿ ಇಂದಿಗೂ ಮನೆಮಾತಾಗಿದೆ.
ಈಗ ಹಲವು ವರ್ಷಗಳ ಸುದೀರ್ಘ ವಿರಾಮದ ನಂತರ, ಗಾಯಕ ಕುನಾಲ್ ಗಂಜಾವಾಲ ಮತ್ತೆ ಸ್ಯಾಂಡಲ್ವುಡ್ಗೆ ಕಂಬ್ಯಾಕ್ ಮಾಡುತ್ತಿದ್ದಾರೆ. ವಿಶೇಷವೆಂದರೆ ಈ ಬಾರಿಯೂ ಅವರು ನಟ ಅಜಯ್ ರಾವ್ ಅವರ ಅಭಿನಯದ ಚಿತ್ರಕ್ಕಾಗಿಯೇ ಹಾಡುತ್ತಿದ್ದಾರೆ.
ಅಜಯ್ ರಾವ್ ನಾಯಕನಾಗಿ ನಟಿಸುತ್ತಿರುವ ‘ಪಾರ್ಟ್ನರ್’ (Partner) ಸಿನಿಮಾದ ‘ಅಮೋರಾ’ (Amora) ಎಂಬ ಮೊದಲ ಸಿಂಗಲ್ ಹಾಡಿಗೆ ಕುನಾಲ್ ಧ್ವನಿಯಾಗಿದ್ದಾರೆ. ಈ ಹಿಟ್ ಕಾಂಬಿನೇಷನ್ ಮತ್ತೆ ಒಂದಾಗಿರುವುದು ಅಭಿಮಾನಿಗಳಲ್ಲಿ ಭಾರೀ ನಿರೀಕ್ಷೆ ಮತ್ತು ಕುತೂಹಲ ಮೂಡಿಸಿದೆ.
ಕನ್ನಡದಲ್ಲಿ ಕುನಾಲ್ ಸೃಷ್ಟಿಸಿದ್ದ ಜಾದೂ
೨೦೦೦ರ ದಶಕದಲ್ಲಿ ಕುನಾಲ್ ಗಂಜಾವಾಲ ಕನ್ನಡ ಚಿತ್ರರಂಗದಲ್ಲಿ ಸಾಲು ಸಾಲು ಸೂಪರ್ ಹಿಟ್ ಹಾಡುಗಳನ್ನು ನೀಡಿದ್ದರು:
- ಆಕಾಶ್ (ನೀನೆಲ್ಲೋ ನಾನಲ್ಲೋ)
- ಮುಂಗಾರು ಮಳೆ (ಒಂದೇ ಒಂದು ಸಾರಿ)
- ಅರಸು (ಕಣ್ಣು ಮುಚ್ಚಿ ಕೂತಾಗ)
- ಚೆಲುವಿನ ಚಿತ್ತಾರ (ಉಲ್ಲಾಸದ ಹೂಮಳೆಯೇ)
- ಮಿಲನ, ಐಶ್ವರ್ಯ, ಚಾರ್ಮಿನಾರ್, ಅರಮನೆ ಮುಂತಾದ ಚಿತ್ರಗಳ ಹಿಟ್ ಗೀತೆಗಳು.
ಕಾಲಕ್ರಮೇಣ ಕನ್ನಡದಲ್ಲಿ ಅವರ ಹಾಡುಗಳು ಕಡಿಮೆಯಾಗಿದ್ದವು. ಈಗ ಮತ್ತೆ ಅವರು ಚಂದನವನಕ್ಕೆ ಮರಳಿರುವುದು ಅವರ ಸಂಗೀತ ಅಭಿಮಾನಿಗಳಿಗೆ ಸಿಹಿ ಸುದ್ದಿಯಾಗಿದೆ.
‘ಅಮೋರಾ’ ಹಾಡಿನ ವಿಶೇಶತೆಗಳು
- ಸಂಗೀತ: ನಕುಲ್ ಅಭಯಂಕರ್
- ಸಾಹಿತ್ಯ: ನಾಗಾರ್ಜುನ ಶರ್ಮ
- ಚಿತ್ರೀಕರಣ: ಪುದುಚೇರಿ ಸುತ್ತಮುತ್ತ ವರ್ಣರಂಜಿತವಾಗಿ ಶೂಟ್ ಮಾಡಲಾಗಿದೆ.
- ಕೊರಿಯೋಗ್ರಫಿ: ಮುರಳಿ ಮಾಸ್ಟರ್. ಈ ಹಾಡಿನಲ್ಲಿ ಅಜಯ್ ರಾವ್ ಸ್ಟೈಲಿಶ್ ಲುಕ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
‘ಪಾರ್ಟ್ನರ್’ ಸಿನಿಮಾ ಬಗ್ಗೆ…
‘ಧೈರ್ಯಂ’ ಚಿತ್ರದ ನಂತರ ನಿರ್ದೇಶಕ ಶಿವ ತೇಜಸ್ ಮತ್ತು ಅಜಯ್ ರಾವ್ ಜೋಡಿ ಈ ಚಿತ್ರದ ಮೂಲಕ ಎರಡನೇ ಬಾರಿ ಒಂದಾಗಿದೆ. ಆಧುನಿಕ ಸಂಬಂಧಗಳು, ಪ್ರೀತಿ, ಬ್ರೇಕಪ್ ಹಾಗೂ ಲಿವ್-ಇನ್ ರಿಲೇಷನ್ಶಿಪ್ಗಳ ಸುತ್ತ ಸಾಗುವ ಈ ಕಥೆಯು, ಜೀವನ ಸಂಗಾತಿಯನ್ನು ಆಯ್ಕೆ ಮಾಡುವಾಗ ನಂಬಿಕೆ ಮತ್ತು ಬದ್ಧತೆ ಎಷ್ಟು ಮುಖ್ಯ ಎಂಬುದನ್ನು ವಿವರಿಸುತ್ತದೆ.
ಚಿತ್ರದಲ್ಲಿ ಅಜಯ್ ರಾವ್ ಅವರಿಗೆ ಜೋಡಿಯಾಗಿ ಬೃಂದಾ ಆಚಾರ್ಯ ಅಭಿನಯಿಸಿದ್ದಾರೆ. ಈಗಾಗಲೇ ಶೂಟಿಂಗ್ ಪೂರ್ಣಗೊಂಡಿದ್ದು, ಸದ್ಯ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ಭರದಿಂದ ಸಾಗಿವೆ.
